Mauro Pili: genis de is sardus , speculatzioni chetza de precedentis, guadangiàus 60 millionis de eurus in dexi dís

Sa banca datus de is sardus comporada po una miséria frutat una capitalizatzioni in sa Bursa de Londra de un +36,94

0

“S’operatzioni apitzus de su DNA de is sardus est su colpu de su séculu. Unu guadàngiu sicu in Bursa de 60 millionis de eurus. In is dexi dís apustis a sa còmpora de su DNA de is sardus is ingresus de sa “Tiziana Life Sciences” si funt postus in busciaca una somma chi balit 230 bortas su balori de còmpora de sa banca datus genética, difatis iant spéndiu sa limusina de 258.000 eurus. Un’aumentu de su balori de bursa arregistrau giai de sa primu dí e crésciu in manera esponéntziali in una cida de bursa fintzas a su 37% de aumentu arregistrau su 25 de Argiolas.
Sa “Tiziana Life” sa dí innantis de sa còmpora, fiat su 15 de Argiolas, ùrtima dí de serrada ainnantis de sa còmpora, baliat in bursa 162 millionis de eurus, in apenas dexi dís su balori de sa capitalizatzioni sodigat i 222 millionis de eurus sinnendi su guadàngiu spantosu de prus de 60 millionis de eurus.
De 162 millionis de eurus a 222 millionis de eurus, unu colpu chentza de precedentis giogau totu asuba de s’ànima genética de is sardus. Si fueddat de unu datu spantosu si si pentzat chi custa operatzioni est totu finantziària e chi in sa matessi anàlisi acapiada a sa bursa de Londra est imputàbbili de unu totu a sa còmpora de sa banca datus ogiastrina. A distàntzia de 3 mesis de cuss’operatzioni su datu in bursa si est afortiau cunfirmendu su balori clamorosu de sa capitalizatzioni in bursa. Un’operatzioni chi po su momentu si cunfirmat in totu su balori speculativu cosa sua chi ia denunciau fintzas de s’inghitzu. S’annúnciu de sa còmpora dd’iant fatu su 18 de Argiolas. E sa comunicatzioni in bursa fiat crara: “Tiziana Life” at comporau is 13.000  campionis po 258.000 eurus. Apustis  de s’annúnciu is atzionis funt artziadas de su balori ,de su 15 de Argiolas, de 1,72 eurus a 2,36 de su 25 de Argiolas, cun un aumentu de balori de 0,64 eurus po atzioni. “Tiziana Life Sciences” tenit capitali nominali de 94.393.401 atzionis de su balori de 3 pence (0.03 sterlinas) s’una. In pràtiga su balori de sa sociedadi in bursa (“Market Capital de s’Azienda) est passau de: 162 millionis de eurus a 222 millionis de eurus est a nai 60 millionis 820 milla eurus in prus”.
Dd’at denunciau immui pagora su deputau de “Unidos” Mauro Pili chi at donau is particularis de sa bursa de Londra esaminaus e aprofundaus de ténnicus de sa “city” londinesa chi apuntu ant postu in luxi sa gravidadi de s’operatzioni cumprida apitzus de sa banca genética sarda.
Pili at torrau a proponni un’interrogatzioni de pressi a su ministru de sa Ricerca e de sa Saludi, de is Ésterus e de sa giustitzia apitzus de custu fatu, própiu po is medas arrescius de tali operatzioni.
“A lograi de s’operatzioni funt pruschetotu is titolaris de is  cuotas chi non funt in béndita  sa “Planwise Group Ltd” cuntrollada de Gabriele Cerrone chi tenit su 60.46%, sa “Nerviano Medical Sciences Srl” cun su 4.58% e “Chris McGuigan” cun su 3.37%. Su chi abarrat est totu  gallegianti in bursa, su chi at generau cussu guadàngiu spantosu. “Un’operatzioni totu finantziària – at portau a sa sbéndita de su prus mannu patrimóniu genéticu de sa Sardigna. 13.000 refertus genéticus ogiastrinus béndius in Londra cumenti chi nudda.  Totu custu cunfirmat su siléntziu cómplici de istitutzionis e política chi at permítiu su sdorrobbatóriu de parti de unu grupu finantziàriu “biotech” britànnicu, a sa circa de su segretu  de sa vida longa.
Una sbéndita bera e própia chi at generau un’operatzioni speculativa chentza de precedentis gestida apitzus de unu fallimentu non sémpiri liniari, a incumentzai de sa béndita a su grupu de Don Verzè. Totu custu – aciungit su deputau de Unidos – cun su siléntziu de is istitutzionis chi mancai is allarmis torraus a ripiti si funt  disinteressadas de unu totu de su fatu“.
” De non podi arriciri sa béndita de cussa banca dati e cumenti apu nau de sa primu dí – at sighiu Pili – is istitutzionis depint impidiri chi su grandu balori de cussu patrimóniu bessat speculatzioni de bursa scéti a sa faci de sa circa e de is sardus e totu chi ant agiudau cun santidu de sacrifíciu a sa costitutzioni de cussa banca datus. A sa luxi de custus datus finàntziarius – acabbat Pili – su sdorrobbu a is dannus de is sardus e de s’ànima genética cosa insoru est ancoras prus gravi e su siléntziu de autoridadis e istitutzionis est oramai de no arriciri.

Annalisa Caboni  Operadora Ufítziu de Língua Sarda Província Sud Sardigna sea de Biddacidru

Questo sito usa Akismet per ridurre lo spam. Scopri come i tuoi dati vengono elaborati.