Un’azienda chi giai òperat in su setori si est proposta difatis de pigai su sítiu industriali de su Campidanu de Mesu cun sa tarea de torrai incumentzai a bellu a bellu is atividadis garantendi de torrai a pigai parti de is trabballadoris. Su programma de ativatzioni noba de sa Keller presentau de s’imbistidori privau previdit una primu fasi de rilànciu e, in prospetiva, sa creatzioni de unu polu regionali altamenti specializau in cuntestu de ferrovias e de tranvis. Sa proposta lassat a biri scenàrius nous in unu momentu incolliosu meda de sa faina chi pertocant sa sorti de su stabbilimentu, immui asuta de curatela faddimentari. A is astas po sa béndita non s’est presentau nemus e su pentzamentu de is sindacaus, cumpartziu puru de s’assessorau, est chi sa fàbbrica potzat essi béndia in lotus, solutzioni chi iat a cumpromiti dónnia possibbilidadi de torrai a fai partiri sa produtzioni.
“ S’impignu de sa Regioni po lompi a una solutzioni positiva – at nau s’assessora Maria Grazia Piras – no est nou. In custus duus annus e mesu, s’atentzioni cosa nosta faci a sa Keller e de is trabballadoris no est mai mancada. Sa possibbilidai de un’interventu de parti de un’imbistidori nou est frutu de trabballu silentziosu, cumenti est giustu chi siat in unus cantu casus, ma forti e spereus de profetu, de parti de s’assessorau. Própiu po custu motivu, cumpartzeus s’augúriu espressau de is trabballadoris po chì is setoris diferentis d’azienda non siant béndius separaus. Sa ripresa de sa Keller est de importu po duus motivus – at acabbau s’assessora Piras – de una parti si iat a salvai un’arrogu de importu de s’aparatu insustriali cosa nosta, de s’àtera si iat a assegurai efetus positivus asuba de s’ocupatzioni in unu territóriu fertu a forti de sa crisi”.
Fonti: Regioni Sardigna
Annalisa Caboni Operadora de s’Ufítziu de Língua Sarda, sea de Biddacidru.
