Is Comunus de Biddacidru e de Serramanna ant aprovau, po médiu de is Consillus cosa insoru, un’acórdiu cun sa tarea de cumpriri in manera coordinada e in forma associada is funtzionis de segreteria comunali, serbendusí de sa professionalidadi de unu Segretàriu Comunali scéti, logrendi diaici un’arrespàrmiu de sa spesa relativa a benefíciu de is Entis associaus. Unu Segretàriu Comunali scéti si depit rendi disponíbbili po is duus entis cunformas a unu calendàriu stabbiliu, est a nai: martis, mércuris e cenàbara at a fai servítziu in Biddacidru mentras lunis e gióbia at a trabballai in Serramanna.
Su Comunu de Bidacidru, cabufila, at a essi s’enti chi at a nominai su Segretàriu e abarrant a càrrigus cosa sua totus is spesas, salvu a arriciri dónnia tanti de tempus de su Comunu de Serramanna is arrembursus po is spesas relativas a sa cumpridura de sa funtzioni de Segretàriu Comunali e is spesas de previdéntzia e de assisténtzia in sa mesura de su 42%. S’acórdiu iat a podi bessiri eficaci giai de cida chi benit mentras po averiguai s’arrespàrmiu efetivu tocat a abetai calincunu mesi.
Annalisa Caboni Operadora de s’Ufíciu de Língua Sarda Provincia Sud Sardigna, sea de Biddacidru.
