Biddacidru. A arriscu sa preséntzia de sa SarMed in sa zona industriali. Ddu denunciant is sindacaus de categoria unius chi tzerriant un’assemblea, previdia po cras 2 de Abrili a is dexi de a mengianu (10,00), in is aposentus de su Cunsórtziu Industriali Cirdesu. A sa basi de sa decisioni eventuali de spostai sa fàbbrica, chi si ocupat de prodotus biomedicalis, nci iat a essi puru su rennovu mancau de su cuntratu de afitu cun sa IGM srl, propietària de su stàbbili innói òperat sa SarMed. Su problema iat a nasci puru de sa voluntadi de aumentai su cànoni de afitu de parti de sa IGM srl, sociedadi chi fait cabu a su Grupu ISA spa, “leader”regionali de sa spratzidura alimentari e Euromix spa, de propiedadi de Giovanni Muscas e Maria Usai. Is sindacaus ant atobiau, su 17 de Friaxu passau, Luciano Fecondini, amministradori delegau SarMed, chi at comunicau su stadu bonu de saludi de sa fàbbrica, chi est abetendi un’órdini de 8.000.000 de eurus de unu clienti americanu. Si perou non si lompit a un’acórdiu cun su locatàriu de su stàbbili cirdesu, s’azienda iat a essi obbligada a arrenúnciai a sa órdini e a trasférriri sa manudòpera in sa zona industriali de Igrésias, innói ddoi at giai un’àtera sea de s’industria de dispositivus médicus. Su spostamentu possíbbili de sa fàbbrica impentzamentat is sindacaus giai chi iat a arrapresentai un’àtera emorragia de postus de trabballu in s’area giai deprímia de su campidanu de mesu.
Annalisa Caboni Operadora de s’Ufítziu de Língua Sarda Província Sud Sardigna sea de Biddacidru
