Cras 4 de Meseladàmini depint incumentzai is “bombardamentus” in su sprigu de mari de s’aristanesu umperau de sémpiri cumenti a polígonu de tiru po is esercitatzionis de sa NATO. Is operadoris de su setori de sa pisca ant procramau su scioperu de sighiu de totu sa marineria de s’aristanesu e a incumentzau própiu de cras, de is seti, po domandai sa serrada de su polígonu NATO de Cabu Frasca e dd’acabbai cun is esercitatzionis militaris.
Is comitaus organizadoris ant a presidiai dí e noti su ponti de Marceddí, blochendindi is intradas de ambaduus is latus. Is piscadoris, autoris de custa protesta clamorosa, ant a blocai puru is bias de intrada a sa basi, cun presídius fissus, e ant a ocupai totu sa zona militari de mari de su polígonu cun s’umperu de unas duxentucincuanta barcas de mannària diferenti. Sa chistioni iat a podi sighiri fintzas a sémpiri fintzas a candu non s’agatat una solutzioni po sa serrada de su polígonu militari e, luegus, po sa smenguadura de su perímetru de su polígonu e su pagamentu de is dannus económicus partius de is operadoris.
Annalisa Caboni Operadora de s’Ufítziu de Língua Sarda Província Sud Sardigna, sea de Biddacidru.
