Su Punteruolu Arrúbiu de is pramas, babballoti de s’Asia meridionali dannosu meda po is pramas, est unu parassitu agressivu meda, in gradu de fai morri in pagu tempus sa mata atacada. S’impestadura at fertu totu sa Sardigna e su babballoti abramiu est lómpiu puru in Biddacidru degumendi is pramas chi nci fiant in su territóriu comunali.
Is privaus funt arrannéscius a cumbati s’impestadura seghendi e sperdendi is pramas malàdias e umperendi mexinas po cussas ancoras bias. Non si podit nai su própiu po is logus púbblicus, innui funt stétius spérdias scéti is matas e is frascas perigulantis mentras unas cantu pramas sicadas funt ancoras in su postu insoru cun is frascas prontas a ndi arrui. In su Parcu Púbblicu n°1 sa situatzioni prus crara cun 11 de is 13 pramas chi nci funt, mortas po nexi de su Punteruolu Arrúbiu. S’atacu de su parassitu non est stétiu totu in una e, duncas una borta tentus is primu sinnalis si iat a essi dépiu intervenni luegus cun is ainas disponíbbilis oi. In su territóriu de Biddacidru su Punteruolu Arrúbiu no est stétiu ancoras spérdiu e est atachendi is úrtimas matas de prama chi nci funt. Su patrimóniu púbblicu contat oramai scéti 7 matas de prama mannas: duas in su Parcu de bia Repúbblica, duas in sa scola elementari de bia Farina, duas in sa scola de mesania n°1 e una in sa scola po sa pipiesa “Pimpa”.
Annalisa Caboni Operadora de s’Ufítziu de Língua Sarda Província Sud Sardigna, sea de Biddacidru.
