Sighit s’impignu de s’Amministratzioni Comunali de Biddacidru, chi at cumentzau unu diàlogu fissu e struturau, po prumovi sa participatzioni de is gióvunus a sa vida de sa comunidadi. S’aasessorau a is Políticas Giovanilis, Giovanni Spano, at prumóviu sa costitutzioni de sa Consulta de is Gióvunus de su Comunu po is gióvunus intra deis 15 e is 30 annus, innui si podint cunfrontai intra de issus e cun su mundu de is mannus, aici de ponni imparis is abbisóngius e is interessamentus de is giovunus e totu e prumovi atividadis a issus dedicadas.
In Meseladàmini funt stétias organizadas una filera de atóbius preliminari, cun sa preséntzia de duus facilitadoris, innui chistionai de sa manera po interessai su númunu prus mannu de gióvunus, is cunditzionis, is arregulas de fissai e is argumentus de prus interessamentu de afrontai.
Is atóbius si faint in su “Caffe Letterario” segundu su calendàriu chi sighit:
lunis 3 de Meseladàmini 2016 h. 18,30-20,30 ( de is ses e mesu fintzas a is otu e mesu de a merí);
lunis 10 de Meseladàmini 2016 h. 18,30-20,30 ( de is ses e mesu fintzas a is otu e mesu de a merí);
mércuris 19 de Meseladàmini 2016 h. 18,30-20,30 ( de is ses e mesu fintzas a is otu e mesu de a merí);
lunis 24 de Meseladàmini 2016 h. 18,30-20,30 ( de is ses e mesu fintzas a is otu e mesu de a merí).
Annalisa Caboni Operadora de s’Ufítziu de Língua Sarda Província Sud Sardigna, sea de Biddacidru
